Cinema Thought

നരൻ 🔥മുള്ളൻകൊല്ലി വേലായുധൻ അതൊരു വികാരമാണ് ❣️❣️ 2004-2006കാലഘട്ടത്തിൽ തൃപ്പൂണിത്തറ ശ്രീകലയിൽ ആയിരുന്നു ഏറ്റവും കൂടുതൽ മോഹൻലാലിന്റെ സിനിമകൾ പ്രദർശിപ്പിച്ചിരുന്നത്. അന്നൊക്കെ ശ്രീകലയിൽ ഷോ 3എണ്ണമേ ഉണ്ടായിരുന്നുള്ളു.2.30,6.30,9.30. അന്നൊന്നും ഈ book my show പരിപാടി ഇല്ലാത്തതു കൊണ്ട് ക്യു നിന്ന് വേണം ടിക്കറ്റ് എടുക്കാൻ. എടുക്കുന്ന ടിക്കറ്റിനു സീറ്റ്‌ നമ്പറും ഉണ്ടാകുല. ഭാഗ്യം ഉണ്ടെങ്കിൽ നല്ല സീറ്റുകൾ കിട്ടും. അല്ലെങ്കിൽ മുൻപിൽ മാത്രമേ സീറ്റ്‌ കിട്ടുകയുള്ളു. അതുകൊണ്ട് തന്നെ 2.30ഷോ കാണുന്നതിനു വേണ്ടി വീട്ടിൽ നിന്നും ഉച്ചക്ക് 12മണി ആകുമ്പോൾ ഇറങ്ങും.. ബസ് കിട്ടി തീയേറ്ററിൽ എത്താൻ എങ്ങനെ പോയാലും നല്ലൊരു സമയം എടുക്കും.ചെന്ന് കഴിഞ്ഞാൽ പിന്നെ ഒരു നിൽപ്പാണ് തീയേറ്ററിന്റെ ഗേറ്റ് ഒന്ന് തുറക്കാൻ..അന്നൊന്നും വൈകുനേരം ഉള്ള ഷോക്കു വീട്ടിൽ നിന്നും വിടുകയില്ല.തൃപ്പൂണിത്തറയിൽ ആണെങ്കിൽ 2.30യുടെ ഷോ. എറണാകുളം ആണെങ്കിൽ 12അല്ലെങ്കിൽ 3മണിയുടെ ഷോ. കാശുണ്ടെങ്കിൽ എറണാകുളത്തു സിനിമ കാണാൻ വിടുമായിരുന്നു അച്ഛനും അമ്മയും. അല്ലെങ്കിൽ തൃപ്പൂണിത്തറയിൽ വരുമ്പോൾ വിടും അതായിരുന്നു പതിവ്. അന്നൊക്കെ എറണാകുളത്തു വിടാത്തപ്പോൾ എല്ലാ വെള്ളിയാഴ്ചയും പേപ്പറിലെ ഇന്നത്തെ സിനിമ കോളം അരിച്ചു പെറുക്കും. എറണാകുളത്തു നിന്ന് പുതിയ സിനിമകൾ നേരെ തൃപ്പൂണിത്തറയിലേക്കാണ് വരുന്നത്.അക്കാലത്തു തൃപ്പൂണിത്തറയിൽ വരുന്ന സിനിമകൾ എങ്ങനെ പോയാലും 4വാരമൊക്കെ കളിക്കും.അതുകൊണ്ട് തന്നെ ശ്രീകല തീയേറ്ററിൽ മാറി വരുന്ന സിനിമകൾ ഏതൊക്കെ എന്ന് പേപ്പറിൽ നോക്കിയാൽ മാത്രമേ അറിയുകയുള്ളു.അങ്ങനെ 2005ലെ സെപ്റ്റംബർ മാസം 3തീയതി നരൻ റിലീസ് ആയി. വീട്ടിൽ നിന്നും എറണാകുളത്തു സിനിമ കാണാനായി വിട്ടില്ല. അങ്ങനെ കാത്തിരുന്നു കാത്തിരുന്നു ഒരു വെള്ളിയാഴ്ച

നരൻ എന്ന സിനിമ വന്നു ശ്രീകലയിൽ.അങ്ങനെ പോയി കണ്ട ഒരു സിനിമയാണ് നരൻ. ഒരു സിനിമയുടെ എല്ലാ ഘടകങ്ങളും മികച്ചു നിന്ന ഒരു സിനിമാനുഭവമാണ് നരൻ എന്നാണ് ഞാൻ വിശ്വസിക്കുന്നത്.സംവിധാനവും രചനയും ഛായാഗ്രഹണവും എഡിറ്റിങ്ങും സംഗീതവും പശ്ചാത്തല സംഗീതവും ഗാനരചനയും ആക്‌ഷനും ആർട്ട്‌ ഡയറക്ഷനും എല്ലാം കിടിലോൽകിടിലം.വിൻസെന്റ് ഗോമസും പൂവള്ളി ഇന്ദുചൂഢനും ജഗന്നാഥനും മംഗലശ്ശേരി നീലകണ്ഠനും ആടുതോമയും എല്ലാം മോഹൻലാൽ എന്ന നടൻ ആടിതിമിർത്തു തീയേറ്ററുകളെ ഉത്സവപറമ്പുകൾ ആക്കി മാറ്റുകയും അതുപോലെ തന്നെ എന്നെ ത്രസിപ്പിച്ചിട്ടുള്ള കഥാപാത്രങ്ങൾ തന്നെ ആണ്. പക്ഷെ മുള്ളൻകൊല്ലി വേലായുധനോട് ഒരു പ്രത്യേക ഇഷ്ടം ഉണ്ട്. മാസ്സ് രംഗങ്ങൾക്ക് വേണ്ടി തയാറാക്കിയ ഒരു സിനിമ അല്ല നരൻ.ഒരുപാട് നല്ല മുഹൂർത്തങ്ങൾ അടങ്ങിയ ഒത്തിരി നല്ല സംഭാഷണങ്ങൾ അടങ്ങിയ നല്ല കുറെ രംഗങ്ങളാൽ സമ്പന്നം ആണ് ഈ സിനിമ. അമ്പല പറമ്പിൽ വെച്ച് നടക്കുന്ന തല്ലിനെ തുടർന്ന് വേലായുധനെ പോലീസ് സ്റ്റേഷനിൽ കൊണ്ടുവരുകയും അവിടെ വെച്ച് മോഹൻലാലിന്റെ കഥാപാത്രം സ്ഥലം എസ് ഐ യോട് പറയുന്ന ഡയലോഗ് ഉണ്ട്. "കർക്കടക മാസത്തിലെ മഴക്ക് സർ മുള്ളൻകൊല്ലി പുഴ കണ്ടിട്ടില്ലല്ലോ.. കുത്തൊലിപ്പിന് ഇന്നതൊക്കെയാ വരുന്നതെന്നു എന്നൊന്നുമില്ല..അങ്ങനെ ഒരു മല വെള്ള പാച്ചിലിൽ ഒഴുകി വന്നതാണ് എന്റെ അമ്മ.. അമ്മയുടെ വയറ്റില് ഒരു കുഞ്ഞു വാവയായിട്ടു ഞാനും ഉണ്ടായിരുന്നു.. എന്നെ കരയിൽ പ്രസവിച്ചിട്ടിട്ടു അമ്മ പിന്നെയും എങ്ങോട്ടോ ഒഴുകി പോയി..പിന്നെ മുള്ളൻകൊല്ലിയിലുള്ള എല്ലാ അമ്മമാരും ചേർന്നാണ് എന്നെ നോക്കിയതും വളർത്തിയതും. വളർന്നു തണ്ടും തടിയുമുള്ള ആണൊരുത്തൻ ആകുമ്പോൾ അവരുടെ കാര്യങ്ങൾ നോക്കാനും സംരക്ഷിക്കാനുമുള്ള ഉത്തരവാദിത്തം എനിക്കില്ലേ സാറേ... നാട്ടിലുള്ള ഒരു പ്രശ്നം ഉണ്ടായാൽ നമ്മൾ ആണുങ്ങൾ അത് ഇടപെട്ടു തീർക്കാൻ ശ്രെമിക്കും " ഇതും പറഞ്ഞിട്ട് സ്റ്റേഷന്റെ തറയിൽ പോയി കയ്യും കെട്ടി ഇരിക്കുന്ന ഒരു രംഗം ഉണ്ട്. അപ്പോൾ ഒരു നിഷ്കളങ്കമായ ഒരു ചിരി ഉണ്ട്... അതുപോലെ മധുവിന്റെ വല്യ നമ്പ്യാർ കഥാപാത്രം കുന്നുമ്മൽ ശാന്തയുടെ വീട്ടിലെ കിടപ്പ് മതിയാക്കാൻ വേലായുധനോട് ആവശ്യപെടുമ്പോൾ അവിടെ നിന്നും ഇറങ്ങി വരുന്ന സമയത്ത് വേലായുധൻ കുന്നുമ്മൽ ശാന്തയോട് പറയുന്ന ഒരു ഡയലോഗ് ആണ് “വഴിപിഴച്ചു പോയ ഒരു പെണ്ണിനെ സംരക്ഷിക്കുക….. അവളെ നേർവഴിക്ക് നടത്തുക അതൊക്കെ നാട്ടുകാരുടെ കണ്ണിൽ വലിയ തെറ്റാ ശാന്തേ….. വേലായുധൻ പൊട്ടൻ അതൊന്നും അന്നേരം അറിയില്ലായിരുന്നു ” സ്വന്തം അച്ഛനെ പോലെ സ്നേഹിച്ച വല്യ നമ്പ്യാർ മരിച്ചു കിടക്കുമ്പോൾ വേലായുധൻ കാണാൻ ചെന്നിട്ടു പോകുന്ന രംഗം.വല്യ നമ്പ്യാരുടെ വീട്ടിൽ നിന്ന് പുറത്തേക്ക് വരുമ്പോ വേലായുധന്റെ മുന്നിലേക്ക് വെല്ലു വിളിയും ആയി ഒരാൾ വരുന്നു. അയാൾ വേലായുധന്റെ കയ്യിൽ കൈത്താങ്ങ് ആയി ഉപയോഗിച്ച വടി കാലു കൊണ്ട് തട്ടി മാറ്റിയിട്ടു "നേരെ നിക്കാറാകുമ്പോൾ പറയണം നമുക്ക് ഒന്നൂടെ ഒന്നു മുട്ടണ്ടേ" എന്ന് പറയുന്നു വേലായുധൻ അവന്റെ മുഖത്തു നോക്കി...

” വേലായുധനേ നേരെ നിന്ന് അടിക്കുവാനുള്ള ചങ്കുറപ്പ് നിനക്ക് ആയിട്ടുണ്ടെൽ ഇപ്പൊ അടിക്കെടാ” എന്നിട്ടു കയ്യിൽ ഇരുന്ന വടി എടുത്ത് മണ്ണിൽ കുത്തിയിട്ട്
“വാ.. ഒറ്റ തന്തക്ക് ഉണ്ടായവൻ ആണേൽ വാടാ” എന്നും പറഞ്ഞുള്ള നോട്ടം..ഉഫ് 🔥🔥🔥 അതുപോലെ ക്ലൈമാക്സിൽ വേലായുധൻ പറയുന്ന ഡയലോഗ് "കണ്ടില്ലേ സർ എന്നെ യാത്രയാക്കാൻ മുള്ളൻകൊല്ലി മുഴുവൻ എത്തിയിട്ടുണ്ട്..ഇതിൽ പരം സന്തോഷമൊന്നും വേലായുധൻ ആഗ്രഹിച്ചിട്ടില്ല. അപ്പോൾ ഇനി ആരോടും യാത്ര ഇല്ല..വാ സാറേ പോകാം ഇനി നിന്നാൽ വേലായുധൻ കരയുന്നത് എല്ലാവരും കാണും.. അത് മോശമാ.. ഈ പുഴയാണ് സാറേ എന്റെ അമ്മ.. വിശന്നപ്പോൾ ഊട്ടിയും കരഞ്ഞപ്പോൾ ആരും കാണാതെ ആ കണ്ണിരൊക്കെ കൊണ്ട് പോയി " എനിക്ക് അന്നും ഇന്നും എന്നും ഒരു വിസ്മയമാണ് നരൻ എന്ന സിനിമ...മുള്ളൻകൊല്ലി വേലായുധൻ അതൊരു വികാരമാണ്... ❣️❣️ ** രാഗീത് ആർ ബാലൻ**